الرحیق المختوم
الرحیق المختوم ، عصرِ حاضر میں فنِ سیرت نگاری کا ایک معیاری نمونہ ہے۔ اصل کتاب عربی زبان میں لکھی گئی اور اسے رابطۂ عالمِ اسلامی کے تحت منعقد ہونے والے بین الاقوامی مقابلۂ سیرت نگاری میں پیش کیا گیا جس پر اسے جیدّ علما اور محققین کے ایک بورڈ نے۱۷۱ مسودات میں سے پچاس ہزار سعودی ریال کے اوّل انعام کا مستحق ٹھہرایا۔ اس نادر تالیف کا اردو ترجمہ فاضل مؤلف کے اپنے ہی قلم سے ہوا ہےمگر یہ کتاب ترجمہ کی بجاۓ مستقلاً ایک طبعزاد تصنیف معلوم ہوتی ہے۔ اس کا اسلوبِ بیان بارِ خاطر بن جانے والے طول اور اظہارِ بیان سے قاصر رہ جانے والے اختصار سے مبرّ ا ہے۔ بلا شک و شبہ الرحیق المختوم سیرت کے موضوع پر لکھی جانے والی کتب میں نمایاں حیثیت کی حامل ہے۔واقعات کے انتخاب، لوازمے کی فراہمی اور ترتیب،اسلوبِ نگارش کی چاشنی،زبان میں دسترس، روزمرہ اور محاورہ پر گرفت اور صحیح مصادر و منابع تک رسائی نے اس کتاب کی علمی اور تحقیقی حیثیت کو نمایاں کیا ہے۔ اس لحاظ سےیہ بات بلا خوفِ تردید کہی جا سکتی ہے کہ پیشِ نظر کتاب حالات و واقعات کی درستی اور تحقیق کے اعتبار سے سیرت کی اہم کتابوں میں سے ایک ہے۔

مولانا صفی الرحمان مبارک پوری
کتاب الرحیق المختوم کے فاضل مصنف مولانا صفی الرحمان مبارک پوری کا شمار عصرِحاضر کے ممتاز علما میں ہوتا ہے۔آپ علماۓ مبارک پور ( ہند ) کے معروف علمی خانوادے سے تعلق رکھتے ہیں۔ اس خاندان کی علمی اور دینی خدمات کو عرب و عجم میں بہت عزت و احترام کی نگاہ سے دیکھا جا تا ہے۔ مو لانا صفی الرحمان ،؁ ۱۹۴۲ میں ہند کےضلع، اعظم گڑھ کے معروف علمی اور صنعتی قصبہ، مبارکپور میں پیدا ہوۓ۔پرا‏ئمری اور مڈل کورس کی تعلیم مکمل کر کے مدرسہ احیا العلوم مبارکپور میں عربی اور دوسرے علوم کی تعلیم حاصل کی۔اس کے بعد علاقے کی اہم دینی درسگاہ مدرسہ فیضِ عام مئو میں عربی زبان و ‍ قواعد اور شرعی علوم و فنون کی تعلیم مکمل کی اور درس و تدریس کا شغل اختیار کیا۔ درس و تدریس کے پہلو بہ پہلو تصنیف و تالیف کامشغلہ بھی جاری رہا۔ مختلف مضامین اور مقالات کے علاوہ بیس سے زائد کتب و رسائل کی تالیف یا ترجمے کا کام سرانجام دیا۔ اس کے علاوہ ماہنامہ محدث بنارس کی ادارت کا فریضہ بھی سر انجام دیتے رہے ۔ الرحیق المختوم کی اشاعت کے بعد اس کتاب کو عوامی حلقوں میں پر جوش پزیرائی نصیب ہوئی ۔ اللہ تعالیٰ فاضل مصنف کو جزاۓ خیر عطا فرماۓ ۔ آمین